الى روح المرحوم ملا فاضل السكراني
أمير الابوذبة وأبرز من لمع في سماها
الشاعر مايموت
ما يموت الشاعر الغازل شمس
او علگ الگمرة أبگصيبة فأتنه
او لو صبح بالفعل مگطوع النفس
يشتعل جمر أبقوافي باطنه
ما يموت الشاعر ألخاوا الحفات
و رگص الضحكة عله أعيون البچي
ينبعث گوه أعله قانون الممات
و من جديد أيعود لبيوت الحچي
ما يموت الشاعر الطش روحه صوت
او فتح أعيون المنصة الغافيه
ممكن أحروف القدر تكتبله موت
لكن أشعارا تسافر ضاويه
او مايموت الشاعر الكلماته جام
لان يعيش أبكل ضواء اليولد فجر
تركض أشعارا مثل سبگ السهام
وتطوي عتمات الماسي و تنتشر
ما يموت ألشاعر الماشه الشعر
لان قوافيه تعج بأحسن صفات
حتى لو جسمة مشه ايزور ألگبر
يلگه أهل المگبرا أتويله الصلاة
وما يموت العانق أجبال الرواسي الشامخات
وكحل الكلمة قصيده أعله الورق
تنصهر روحه أبمجد نبض الحياة
وتشتعل شمعة أبوسط عتم النفق
